Zerikarli bo'ladi
Intizomga aloqador o'ylar, yana.
Intizomni muvaffaqiyat kaliti deb qarasak, muvaffaqiyat miqdori zerikish miqdoriga mutanosib
yoki
zerikishga qancha ko'p chiday olishga.
O'zing qiziqqan sohani topishing kerak, ishing zerikarli bo'lmasligi kerak degan gaplar to'g'ri kelmaydi. Ko'p zerikarli ishlar yaxshi daromad olib keladi. Qiyinligi uchunmas, aynan zerikarli ekanligi uchun.
QISQA TUSHUNTIRISH
ZERIKARLI DEGANI TAKRORLANUVCHI(AVTOMATLASHTIRSA BO'LADIGAN) DEGANI EMAS. TAKRORLANUVCHI DEGANI ZERIKARLI DEGANI. ZERIKARLI DEGANI SHUNCHAKI YANGI NARSALAR KASHF QILMAYSIZ DEGANI.
TUGADI
Misollar bilan yaxshiroq tushunasiz:
Biostatistika. Materialshunoslik. Davlat tenderlari. Korporativ dasturiy ta'minot.
Bular har kuni qiziqarli va yangi muammolar hal qilinadigan sohalar emas. Aslida aqliy jihatdan ham juda murakkab emas, faqat psixologik jihatdan qiyin. Bir xillikka chidash qiyin. Shuning uchun ham yaxshi daromad olib keladi. Ayniqsa, tor, texnik sohalarda. Chunki dunyo shunaqa ishlaydi, zerikarli bo'lgan lekin hammaga kerak bo'lgan sohalar ustiga qurilgan.
Tabiiy filtr. Raqobatning katta qismini olib tashlaydigan filtr.
Ko'pchilik chiranib ko'radi, 5,6 oy ishlab ko'radi, chidamaydi, kamroq daromad bo'lsa ham qiziqarliroq yo'nalishlarga o'tib ketishadi.
QISQA TUSHUNTIRISH
ZERIKARLI SOHADA ISHLAYDI DEGANI O'ZI HAM ZERIKARLI ODAM DEGANIMAS. UMUMAN UNAQA EMAS. SHUNCHAKI SHUNGA CHIDAY OLISH KO'NIKMASI BOR, BOSHQA KO'NIKMALAR KABI.
TUGADI
ENDICHI?
Zerikarli ishlarga chidadik, yaxshi daromad topdik, xohlaganimizga erishdik endi nima? Zerikish yo'qoladimi? Yo'q, endi haqiqatda bu muammoga aylanadi.
Ba'zilar kelajagini bunday tasavvur qilishi mumkin:
Hammasiga erishsang, karyera, oila, ideal turmush tarzi, zerikish o'z-o'zidan yo'qoladi. Hammasiga erishding, baxtlisan.
Bu fikrlar zerikish nimaligini bilmaslikdan keladi. Zerikarli hayot degani xato/yomon/notinch/noto'g'ri hayot degani emas. Zerikarli hayot degani hayotingni o'zing xohlaganingcha yaxshilading, endi kashfiyotlar tugadi degani.
Maqsadlarga erishasan, keyin baribir zerikaverasan. To'g'ri/noto'g'riligiga aloqasi yo'q.
Muvaffaqiyat degani ham shu-ku aslida, o'zing xohlagandek/kutgandek natijalar kelishi. Bu esa qiziq bo'lolmaydi.
Zerikarli bo'ladi.
YECHIMI QANDAY BO'LADI?
BILMAYMAN HOZIRCHA.